प्रसिद्ध पंजाबी गायक दलेर मेहंदी यांच्या उत्तराखंडमधील एका कार्यक्रमावरून वाद निर्माण झाला आहे. टिहरी जिल्ह्यातील कुंजापुरी मेळाव्यात रविवारी दलेर मेहंदी यांचा कार्यक्रम सुरू असताना राज्याचे कॅबिनेट मंत्री सुबोध उनियाल यांनी थेट मंचावर जाऊन त्यांना गाणे थांबवण्यास सांगितले. नवरात्रीनिमित्त आयोजित सांस्कृतिक कार्यक्रमात दलेर मेहंदी यांनी मद्यपान करून गाणे सादर करणे योग्य नसल्याचे सांगत मंत्र्यांनी आक्षेप घेतला.
सुबोध उनियाल हे नरेंद्रनगर मतदारसंघाचे आमदारही आहेत. कुंजापुरी मेळावा हा परिसरातील महत्त्वाचा धार्मिक आणि सांस्कृतिक सोहळा मानला जातो. नवरात्रीच्या उत्सवाचा भाग म्हणून आयोजित या कार्यक्रमात देवी दुर्गेची पूजा केली जात असताना कलाकारांनी धार्मिक कार्यक्रमाचे पावित्र्य आणि शिस्त जपली पाहिजे, अशी भूमिका मंत्र्यांनी मांडली.
‘देवी दुर्गेच्या कार्यक्रमात मद्यपान करून गाणे योग्य नाही’
दलेर मेहंदी यांचे गाणे सुरू असताना सुबोध उनियाल मंचावर गेले आणि त्यांनी गायकाच्या शेजारी उभे राहून आपली नाराजी व्यक्त केली.
“नवरात्रीनिमित्त येथे देवी दुर्गेचा कार्यक्रम आयोजित करण्यात आला आहे. अशा कार्यक्रमात तुम्ही मद्यपान करून गाणी गात आहात, हे योग्य नाही,” असे मंत्री सुबोध उनियाल यांनी मंचावरून सांगितले.
धार्मिक उत्सवाचे स्वरूप लक्षात घेऊन कलाकारांनी कार्यक्रमाची प्रतिष्ठा आणि मर्यादा पाळणे आवश्यक असल्याचेही त्यांनी स्पष्ट केले.
‘तुम्हाला मोठं नाव आहे, म्हणून बोलावलं’
दलेर मेहंदी यांना कार्यक्रमासाठी आमंत्रित करण्यामागचा उद्देश स्थानिक नागरिकांचे मनोरंजन करणे हा होता, असे उनियाल यांनी सांगितले. मात्र, सध्या जे घडत आहे ते योग्य नसल्याचे म्हणत त्यांनी गायकाला सुनावले.
“आम्ही तुम्हाला येथे बोलावले, कारण आमच्या लोकांचे मनोरंजन व्हावे. पण तुम्ही आमचीच फजिती करत आहात. हे चुकीचे आहे, अगदी चुकीचे आहे. तुमचे मोठे नाव आहे आणि आपण त्याचा आदर केला पाहिजे. तुम्हाला मोठे नाव आहे म्हणूनच येथे बोलावण्यात आले,” असे उनियाल म्हणाले.
या वक्तव्यादरम्यान मंत्री गायकाच्या शेजारी उभे राहून त्यांना कार्यक्रम थांबवण्यास सांगत असल्याचे व्हिडिओमध्ये दिसते.
दलेर मेहंदी यांची मंचावरून जाण्याची विनंती
या घटनेच्या व्हिडिओमध्ये दलेर मेहंदी यांनीही मंत्र्यांना मध्येच थांबवण्याचा प्रयत्न केल्याचे दिसते. “सर, मी हात जोडून विनंती करतो… कृपया मंचावरून खाली जा,” असे ते मंत्र्यांना म्हणताना ऐकू येतात.
या प्रसंगानंतर कार्यक्रमातील वातावरण आणि मंत्र्यांच्या हस्तक्षेपाबाबत चर्चा सुरू झाली आहे. घटनेचा व्हिडिओ सोशल मीडियावर मोठ्या प्रमाणात व्हायरल झाला असून, या प्रकारामुळे दलेर मेहंदी यांच्या कार्यक्रमाची चर्चा रंगली आहे.
दिलेर मेहंदी पर फूटा कैबिनेट मंत्री सुबोध उनियाल का गुस्सा
उत्तराखंड में एक कार्यक्रम के दौरान मशहूर पंजाबी सिंगर दिलेर मेहंदी को भजन गाने के लिए बुलाया गया था। जहां मौजूद मंत्री सुबोध उनियाल ने कहा, बोल तो पा नहीं रहे गाना क्या गाओगे!
आखिर क्यों नहीं बोल पा रहे थे दिलेर मेहंदी?
— Bhupi Panwar (@askbhupi) October 19, 2026
