सीजेपी नेते सौरव दास आणि आशुतोष रांका यांना यांच्या न्यायालयीन कोठडीत आणखी दोन दिवसांची वाढ करण्यात आली आहे. विशेष दंडाधिकाऱ्यांनी हा निर्णय सुनावला आहे. आंदोलन स्थळांच्या यादीतून वगळल्यानंतर जंतरमंतरवर विनापरवानगी प्रवेश करून तिथे विरोध प्रदर्शन करण्याचा प्रयत्न केल्याप्रकरणी दिल्ली पोलिसांनी या दोन्ही नेत्यांना १३ ऑक्टोबर २०२६ रोजी ताब्यात घेतले होते. या प्रकरणाची पुढील सुनावणी २१ ऑक्टोबर रोजी होणार आहे.
अटकेनंतर १४ ऑक्टोबर रोजी या दोघांनाही विशेष कार्यकारी दंडाधिकाऱ्यांसमोर हजर करण्यात आले. त्यावेळी न्यायालयाने सीजेपीच्या या दोन्ही प्रवक्त्यांना पाच दिवसांची न्यायालयीन कोठडी सुनावत त्यांची रवानगी तिहार तुरुंगात केली होती. आता या कोठडीत आणखी दोन दिवसांची भर पडली आहे.
दरम्यान, सीजेपीच्या कायदेशीर सेलच्या प्रमुख रत्ना सिंह यांनी रविवारी न्यायव्यवस्थेच्या प्रक्रियेवर काही गंभीर आरोप केले. विशेष कार्यकारी दंडाधिकारी वेळेवर न पोहोचल्यामुळे सौरव दास आणि आशुतोष रांका यांच्या जामीन अर्जावरील सुनावणीला विलंब झाल्याचा दावा त्यांनी केला. तसेच चार जामीनदारांची हमीदेखील अत्यंत अस्पष्ट कारणास्तव फेटाळून लावण्यात आल्याचा आरोप त्यांनी केला आहे.
