बेस्टमध्ये चढताना अथवा धावत्या बसमध्ये गर्दीचा गैरफायदा उचलत प्रवाशांच्या खिशातले मोबाईल शिताफीने लंपास करणाऱया सराईत चोरटय़ांच्या घाटकोपर पोलिसांनी मुसक्या आवळल्या आहेत. त्या चोरांकडून मोबाईल हस्तगत करण्यातही यश आले आहे. हेमंत यादव हे खरेदी करून घरी जाण्यासाठी घाटकोपर रेल्वे स्थानक परिसरात 303 क्रमांकाच्या बसमध्ये चढत असताना त्यांचा मोबाईल चोरण्यात आला. याबाबत त्यांनी घाटकोपर पोलिसांकडे तक्रार दिल्यानंतर वरिष्ठांच्या मार्गदर्शनाखाली उपनिरीक्षक पद्माकर पाटील व त्यांच्या पथकाने तपास सुरू केला. पथकाने घटनास्थळावरील सीसीटीव्ही फुटेज तपासल्यावर आरोपी शीव-कुर्ला-घाटकोपर-असल्फा-अंधेरी या मार्गावर बेस्ट बसमध्ये नियमित चोऱया करत असल्याचे समोर आले. ते आरोपी गोवंडीच्या शिवाजी नगर परिसरात राहणारे असल्याचे समजताच पोलिसांनी तेथे जाऊन रज्जाक सय्यद, अब्दुल खान या दोघांसह एका अल्पवयीन मुलाला पकडले. त्यांच्याकडून चोरीचा एक मोबाईल हस्तगत करण्यात आला.
