जपानच्या नैऋत्य भागाला हादरवणाऱ्या शक्तिशाली भूकंपानंतर मृतांचा आकडा १३ वर पोहोचला असून, बेपत्ता व्यक्तींचा शोध घेण्यासाठी बचावकार्य बुधवारी सकाळीही सुरू असल्याची माहिती जपानच्या पंतप्रधान सानाए ताकाइची यांनी दिली.
मंगळवारी उशिरा दुपारी जपानच्या दक्षिणेकडील प्रमुख बेट क्युशूवरील कुमामोटो परिसरात रिश्टर स्केलवर ७.१ तीव्रतेचा भूकंप झाला.
‘अजूनही काही जण मदतीची वाट पाहत आहेत आणि त्यांना वाचवण्यासाठी हरप्रकारे प्रयत्न सुरू आहेत’, असे ताकाइची म्हणाल्या. ‘जास्तीत जास्त लोकांचा शोध घेऊन त्यांची सुटका करण्यासाठी आम्ही सर्वतोपरी प्रयत्न करू.’
ताकाइची यांनी मृतांच्या कुटुंबीयांप्रती शोकसंवेदना व्यक्त केल्या आहेत. तसेच भूकंपग्रस्तांना स्वतःची काळजी घेण्याचे आवाहन केले.
जपानच्या सेल्फ डिफेन्स फोर्सेसचे जवानही बचाव पथकांसोबत शोध आणि बचाव मोहिमेत सहभागी झाले असून, मोठ्या प्रमाणात नुकसान झालेल्या शॉपिंग मॉलमध्ये शोधमोहीम सुरू आहे. तसेच, सर्वाधिक फटका बसलेल्या भागांमध्ये पाणी, अन्न आणि इतर अत्यावश्यक वस्तूंचा पुरवठा करण्यात येत असल्याचे त्यांनी सांगितले.
कुमामोटो प्रांताची राजधानी असलेल्या कुमामोटो शहरातील अग्निशमन विभागाच्या माहितीनुसार, काशिमा टाऊनमधील एऑन मॉलचा दुसरा मजला कोसळल्याने अनेक जण त्याखाली अडकले.
कुमामोटो आपत्कालीन पथकाने सांगितले की, निप्पॉन पेपर इंडस्ट्रीज कंपनीच्या यात्सुशिरो कारखान्यातील धुराडे कोसळल्याने काही जण ढिगाऱ्याखाली अडकले.
अग्निशमन आणि आपत्ती व्यवस्थापन संस्थेने सांगितले की, प्रमुख सार्वजनिक इमारती किंवा पायाभूत सुविधांचे मोठे नुकसान झालेले नाही. तसेच, अणुऊर्जा नियमन प्राधिकरणाने जवळील तीन अणुऊर्जा प्रकल्पांमध्ये कोणतीही असामान्य बाब आढळली नसल्याचे सांगितले.
जपान हादरले! 7.1 तीव्रतेच्या भूकंपाचा धक्का, त्सुनामीचा इशारा
क्योडो वृत्तसंस्थेने दिलेल्या माहितीनुसार, यात्सुशिरो शहरातील एका रुग्णालयात सुमारे ४० जखमींना दाखल करण्यात आले असून, आणखी सुमारे ५० जणांना कुमामोटो शहरातील रुग्णालयात हलविण्यात आले.
क्युशूमधील अनेक प्रमुख उत्पादन कंपन्यांनी मंगळवारी आपले कामकाज तात्पुरते बंद ठेवले होते. मात्र, कोणतेही मोठे नुकसान झाले नसल्याचे स्पष्ट झाल्यानंतर त्यांनी बुधवारी पुन्हा कामकाज सुरू करण्याचे नियोजन केले.
असो कुमामोटो विमानतळावरील धावपट्टी बंद करण्यात आली असून, ती पुन्हा कधी सुरू होईल याबाबत तत्काळ कोणतीही माहिती देण्यात आलेली नाही.
