उत्तराखंडमधील केदारनाथ यात्रा मार्गावर छावडीजवळ दरड कोसळून मोठे खडक आणि ढिगारा पडल्याने हा मार्ग तात्पुरता बंद करण्यात आला आहे. भाविकांच्या सुरक्षेचा उपाय म्हणून प्रशासनाने या मार्गावरील पायी वाहतूक तातडीने थांबवली असून, सर्व यात्रेकरूंना सुरक्षित ठिकाणी थांबवण्यात आले आहे.
रुद्रप्रयागचे जिल्हा आपत्ती व्यवस्थापन अधिकारी नंदन सिंग राजवार यांनी एएनआय (ANI) या वृत्तसंस्थेला दिलेल्या माहितीनुसार, आज पहाटे गौरीकुंड आणि चीलबासा दरम्यान केदारनाथ पायी मार्गावर काही ठिकाणी छोटे, तर काही ठिकाणी मोठे खडक कोसळल्याच्या घटना घडल्या. यानंतर जिल्हाधिकाऱ्यांच्या सूचनेनुसार या मार्गावरील पायी वाहतूक त्वरित थांबवण्यात आली. प्रशासनाने भाविकांना छावडीजवळील बाधित भागात जाण्यापासून रोखण्यासाठी यात्रा व्यवस्थापन दलाला तैनात केले आहे.
यासोबतच सेक्टर अधिकारी, सब-सेक्टर अधिकारी, एमटीएफ, आपत्ती मित्र आणि डीडीआरचे कर्मचारीही या मार्गावर तैनात करण्यात आले आहेत. सध्या संबंधित यंत्रणा रस्ता मोकळा करण्याचे काम वेगाने करत आहेत. रस्ता खुला होताच यात्रा पुन्हा सुरू केली जाईल.
