बोरिवली येथील गोराई-मनोरी बीचजवळ चार महिन्यांपासून अडकलेल्या जहाजावर चार जणांचे मृतदेह सापडल्याने खळबळ उडाली आहे. हे चारही जण चोरीच्या उद्देशाने जहाजात घुसले होते. यावेळी गॅस गळतीमुळे गुदमरून त्यांचा मृत्यू झाल्याचा संशय आहे. मृत्यूचे नेमके कारण शवविच्छेदन आणि पोलीस तपासानंतरच कळेल.
आज तकने दिलेल्या वृत्तानुसार, हे जहाज सुमारे चार महिन्यांपूर्वी मनोरी समुद्रकिनाऱ्यावर अडकले होते. जहाजाच्या मालकाविरुद्ध आधीच गुन्हा दाखल करण्यात आला असून, तो सध्या फरार आहे. या जहाजाचा वापर अवैध तेल व्यापारासाठी केला जात होता, असे प्राथमिक तपासात समोर आले आहे. अद्याप याला अधिकृतपणे दुजोरा मिळालेला नाही.
दरम्यान, जहाजावर यापूर्वीही दोन वेळा चोरी झाल्याचे पोलीस तपासात उघड झाले आहे. यानंतर, चोरी करण्याच्या उद्देशाने अंदाजे आठ जण स्पीडबोटने जहाजावर पोहोचले. प्राथमिक माहितीनुसार, एक व्यक्ती स्पीडबोटवरच थांबली होती, तर इतर सात जण जहाजात शिरले. यापैकी चार जण जहाजाच्या आत पाईप कापायला गेले. याच दरम्यान गॅस गळती झाल्याचा संशय आहे. प्राथमिक माहितीनुसार, विषारी वायूमुळे किंवा ऑक्सिजनच्या कमतरतेमुळे गुदमरून या चौघांचा मृत्यू झाला.
या घटनेची माहिती मिळताच, गोराई पोलीस घटनास्थळी दाखल झाले. प्रकरणाचे गांभीर्य लक्षात घेऊन नौदलालाही पाचारण करण्यात आले. नौदलाच्या मदतीने जहाजात अडकलेल्या चार जणांचे मृतदेह बाहेर काढण्यात आले. पोलिसांनी अन्य तीन संशयितांना ताब्यात घेतले आहे. पोलीस प्रकरणाचा सखोल तपास करत आहेत.
