तमिळनाडूचे मुख्यमंत्री सी. जोसेफ विजय यांची झलक पाहाण्यासाठी मंगळवारी शेकडो चाहते लंडनमधील सर्वात उंच इमारत असलेल्या ‘द शार्ड’ बाहेर जमले होते, परंतु सुरक्षेच्या कारणास्तव मेट्रोपॉलिटन पोलिसांनी हस्तक्षेप केल्यानंतर हा कार्यक्रम रद्द करण्यात आला.
कार्यक्रम रद्द झाल्यामुळे अनेक चाहते निराश झाले. अनेक जण तर बऱ्याच तासांपासून रांगेत उभे होते.
‘लोकांच्या सुरक्षेच्या कारणास्तव आम्ही हा कार्यक्रम रद्द करत आहोत’, असे मुख्यमंत्र्यांच्या सोबत असलेल्या एका सदस्याने लाऊडस्पीकरवरून जाहीर केले.
‘लोकांच्या सुरक्षेचा विषय असल्याने मला हा निर्णय अगदी योग्य वाटत आहे. पण यातील सर्व लोक बराच काळापासून वाट पाहत होते. तमिळनाडूमध्ये आपण पाहतो तशी ही गर्दी मुळीच नाही’, असे हॉटेलजवळ बराच काळापासून थांबलेल्या एका तरुण चाहत्याने सांगितले. तमिळनाडूमध्ये गुंतवणूक आणण्यासाठी मुख्यमंत्री विजय आणि त्यांचे शिष्टमंडळ लंडनमध्ये दाखल झाले आहे. विजय या शिष्टमंडळाचे नेतृत्व करत आहेत.
तत्पूर्वी, मुख्यमंत्री कार्यालयाने सांगितले की, या दौऱ्यादरम्यान शिष्टमंडळाने सुमारे १२ हजार ३०० कोटी रुपयांच्या गुंतवणुकीशी संबंधित अनेक सामंजस्य करारांवर (एमओयू) स्वाक्षऱ्या केल्या आहेत.
तमिळनाडूची आशियातील प्रमुख प्रगत मॅन्युफॅक्चरिंग आणि तंत्रज्ञान केंद्र म्हणून ओळख निर्माण करण्याच्या उद्देशाने चालवलेल्या या गुंतवणूक मोहिमेमुळे संपूर्ण राज्यात ९ हजार ४०० पेक्षा जास्त उच्च-मूल्याची नोकऱ्या निर्माण होणे अपेक्षित आहे.
विजय त्यांचा यूके दौरा संपवून बुधवारी हिंदुस्थानात परतणार आहेत.
