![rohit-pawar-ajit-pawar](https://www.saamana.com/wp-content/uploads/2024/01/rohit-pawar-ajit-pawar-696x447.jpg)
बारामती लोकसभा मतदार संघात सुनेत्रा पवार विरुद्ध सुप्रिया सुळे या नणंद भावजया एकमेकांसमोर लढत आहेत. या मतदारसंघात उद्या ७ मे रोजी मतदान होणार आहे. काही दिवसांपूर्वीच अजित पवार यांनी या बाबत बोलताना 4 जून नंतर या मतदारसंघात फक्त मी एकटाच पवार उरणार आहे. बाकी कुणी पवार दिसणार नाहीत. जर दिसले तर मी मिशा उडवेन असे वक्तव्य केले होते. त्यांच्या या वक्तव्यावरून त्यांच्यावर मोठ्या प्रमाणात टीका झाली होती. आज रोहीत पवार यांनी देखील एक पोस्ट शेअर करत अजित पवार यांना हातात वस्तरा घेऊन मिशा काढायला तयार रहा असा इशारा दिला आहे.
ज्यांनी कॅन्सरलाही पराभूत केलं, भाजपसारख्या महाशक्तीलाही पाणी पाजलं, सत्तेच्या दबावाला सत्याच्या ताकदीवर झुकवलं तो आहे महाराष्ट्राचा सह्याद्री…. अजिंक्य योद्धा आदरणीय पवार साहेब!
अनेकजण एकाच मतदारसंघात अडकून पडले पण या योद्ध्याने गेल्या २२ दिवसात तब्बल ५२ सभा घेऊन भाजप… pic.twitter.com/VHuSF54Hm0
— Rohit Pawar (@RRPSpeaks) May 6, 2024
”ज्यांनी कॅन्सरलाही पराभूत केलं, भाजपसारख्या महाशक्तीलाही पाणी पाजलं, सत्तेच्या दबावाला सत्याच्या ताकदीवर झुकवलं तो आहे महाराष्ट्राचा सह्याद्री…. अजिंक्य योद्धा आदरणीय पवार साहेब! अनेकजण एकाच मतदारसंघात अडकून पडले पण या योद्ध्याने गेल्या 22 दिवसात तब्बल 52 सभा घेऊन भाजप सरकारविरोधात रान उठवलं…. आणि कालपासून तब्येत बरी नसताना आणि डॉक्टरांनी दौऱ्याला विरोध केला असतानाही हा योद्धा केवळ 1 दिवसाची क्षणभर विश्रांती घेऊन पुन्हा मैदानात निघालाय… हाती विचारांचं हत्यार घेऊन… म्हणतात ना… योद्धा कधी जखमांच्या वेदना उगाळत बसत नाही. त्यामुळे काही लोकांनी हाती वस्तरा घेऊन तयार रहावं…. मिशा_काढण्यासाठी”, असा टोला रोहीत पवार यांनी लगावला आहे.
रोहीत पवार यांनी या पोस्टसोबत शरद पवार यांचे 8 मे ते 10 मे चे कार्यक्रम शेअर केले आहेत. यात शरद पवार हे तिनही दिवस पश्चिम महाराष्ट्रात बैठका घेणार आहेत.