कानपूरच्या नौबस्तामध्ये रविवारी पहाटे दोन जुळ्या मुलींची गळा चिरून हत्या केली गेली. रविवारी पहाटे (19 एप्रिल) ही घटना घडली आहे. वडिलांनी त्यांच्या फ्लॅटमध्येच मुलींचे गळे चिरले आणि त्यानंतर पोलिसांना माहिती दिली. आरोपी वडिलांना पोलिसांकडून अटक करण्यात आली आहे.
सदर घटनेची माहिती देताना डीसीपी दीपेंद्र नाथ चौधरी यांनी सांगितले की, “मेडिकल रिप्रेझेंटेटिव्ह असलेले शशी रंजन मिश्रा हे त्यांची पत्नी, अकरा वर्षाच्या दोन जुळ्या मुली, व 6 वर्षांचा एक मुलगा यांच्यासोबत किडवाई नगर येथील त्रिमूर्ती अपार्टमेंटमध्ये राहायचे. रविवारी दुपारी त्यांनी राहत्या घरात आपल्या जुळ्या मुलींची धारदार शस्त्राने गळाचिरून हत्या केली. त्यानंतर तिथेच मृतदेहाच्या शेजारी रक्ताच्या थारोळ्याजवळ बसून त्यांनी पोलिसांना फोन करून आपला गुन्हा कबूल केला.
घटनेची माहिती मिळताच पोलीस तत्काळ मिश्रा यांच्या घरी पोहोचले. त्यावेळी दोन्ही मुलींचे मृतदेह जमिनीवर एकमेकांच्या शेजारी रक्ताच्या थारोळ्यात पडलेले होते. जवळच एक चाकू पडलेला होता. आरोपी वडीलही मृतदेहांजवळ बसले होते. पोलिसांनी त्यांना तत्काळ अटक केली.
या घटनेनंतर मिश्रा यांच्या पत्नीने पोलिसांना दिलेल्या माहितीनुसार, “२०१४ मध्ये त्यांचा प्रेमविवाह झाला होता. नवरा दारूच्या नशेत तिला रोज मारहाण करायचा. तो तिला खोलीत जाऊ देत नसे तसेच दोन्ही मुलींसोबत त्यांच्या खोलीतच राहायचा. तो अनेकदा पत्नीला घर सोडून जायला सांगायचा.
