फुटबॉलचा जादूगार लिओनेल मेस्सीने फिफा वर्ल्ड कपमधील आपल्या विक्रमी सहाव्या सहभागाची अविस्मरणीय नोंद करत पहिलीच विश्वचषक हॅट्ट्रिक झळकावून ऐतिहासिक कामगिरी केली. त्याच्या तुफानी खेळीच्या जोरावर गतविजेत्या अर्जेंटिनाने अल्जेरियाचा 3-0 गोल फरकाने धुव्वा उडवत वर्ल्ड कप मोहिमेची संस्मरणीय सुरुवात केली.
मेस्सीने आपल्या खास शैलीतील सुरेख धाव घेत पेनल्टी क्षेत्राच्या बाहेरून जोरदार डाव्या पायाचा फटका मारला.
अल्जेरियाचा गोलरक्षक लुका झिदान याला तो अडवता आला नाही आणि अर्जेंटिनाने गोलचे खाते उघडले. दुसऱ्या सत्रात अर्जेंटिनाचा दबदबा कायम राहिला. 60व्या मिनिटाला अॅलेक्सिस मॅक ऑलिस्टरच्या फटक्यानंतर उसळलेल्या चेंडूवर मेस्सीने अचूक टॅप-इन करत आपला दुसरा गोल नोंदवला. त्यानंतर 76 व्या मिनिटाला पेनल्टी क्षेत्राबाहेरून केलेल्या अचूक आणि वेगवान फटक्याने त्याने ऐतिहासिक हॅट्ट्रिक साजरी केली. हा गोल मेस्सीचा वर्ल्ड कपमधील 16 वा गोल ठरला आणि त्याने जर्मनीच्या मिरोस्लाव क्लोझेच्या विक्रमाशी बरोबरी साधली.
अल्जेरिया संघ संपूर्ण सामन्यात प्रभाव पाडू शकला नाही. नवव्या मिनिटाला फारेस चायबीचा गोल ऑफसाईडमुळे रद्द झाल्याने त्यांची संधीही हुकली.
