चंद्रपूर जिल्ह्यात शेतकरी आत्महत्यांचे सत्र सुरूच आहे. वरोरा तालुक्यातील आर्वी गावात कर्जबाजारीपणमुळे 60 वर्षीय शेतकरी विजय कान्होबा तिवाडे यांनी गळफास घेऊन आत्महत्या केली. विजय यांच्या मृत्यूमुळे कुटुंबावर दुःखाचा डोंगर कोसळला असून, या घटनेमुळे गावात हळहळ व्यक्त केली जात आहे. चंद्रपूर जिल्ह्यात दोन दिवसांत दोन शेतकऱ्यांनी आत्महत्या केल्याने शेतकऱ्यांच्या आर्थिक परिस्थितीचा प्रश्न पुन्हा एकदा ऐरणीवर आला आहे.
विजय कान्होबा तिवाडे यांच्याकडे पाच एकर कापसाची शेती होती. त्यांच्यावर सुमारे तीन लाख रुपयांचे कर्ज असल्याची माहिती समोर आली आहे. शेतीवर अवलंबून असलेल्या तिवाडे यांच्यासमोर आर्थिक अडचणी उभ्या राहिल्या होत्या. कर्जाच्या विवंचनेतून त्यांनी हे टोकाचे पाऊल उचलल्याची प्राथमिक माहिती आहे. शेतीतून मिळणारे उत्पन्न, वाढता उत्पादन खर्च आणि कर्जाची परतफेड यांसारख्या प्रश्नांमुळे शेतकऱ्यांसमोरील आर्थिक आव्हाने पुन्हा चर्चेत आली आहेत.
या घटनेची माहिती मिळताच पोलीस आणि प्रशासनाचे अधिकारी घटनास्थळी पोहोचले. घटनेची पाहणी करून पुढील कार्यवाही करण्यात आली. आत्महत्येमागील नेमकी परिस्थिती आणि इतर तपशीलांबाबत अधिकृत माहिती समोर येणे बाकी आहे.
