गेल्या वर्षी महापौरपदाच्या निवडणुकीत कोणार्क विकास आघाडीच्या उमेदवाराला मतदान करणाऱ्या काँग्रेसच्या बंडखोर 18 नगरसेवकांना अभय मिळाले आहे. त्यांच्या विरोधातील याचिका कोकण विभागीय आयुक्तांनी फेटाळली आहे. या नगरसेवकांनी आधीच राष्ट्रवादीमध्ये प्रवेश केला असून आजच्या निकालानंतर नगरसेवकांनी जल्लोष केला.
सर्वाधिक 47 नगरसेवक असलेल्या काँग्रेस पक्षातील 18 नगरसेवकांनी बंडखोरी करीत कोणार्क विकास आघाडीच्या पारडय़ात आपले मत टाकले व सत्तेत सहभाग घेतला होता. त्या विरोधात काँग्रेस नगरसेवक व माजी महापौर जावेद दळवी यांनी कोकण विभागीय आयुक्तांकडे धाव घेतली. बंडखोरीविरोधात याचिका दाखल करून 18 नगरसेवकांना पदावरून बडतर्फ करण्याची मागणी केली होती. सर्व बंडखोर नगरसेवकांनी तत्कालीन काँग्रेस अध्यक्षांसह राष्ट्रवादी काँग्रेस पक्षात प्रवेश केला आहे. राष्ट्रवादीचे शहराध्यक्ष शोएब खान गुड्डू, उपमहापौर इम्रान वली खान, माजी उपमहापौर अहमद सिद्दीकी यांसह नगरसेवकांनी जल्लोष केला.
