मतदार यादीतून मोठ्या प्रमाणावर नावे वगळल्याचे आरोप, कथित मतचोरी आणि दिल्लीतील आंदोलनादरम्यान झालेल्या पोलीस कारवाईच्या मुद्द्यावर चर्चा करण्यासाठी संसदेचे विशेष अधिवेशन बोलवावे, अशी मागणी आम आदमी पक्षाचे (आप) राज्यसभा खासदार संजय सिंह यांनी केली आहे. यासंदर्भात त्यांनी पंतप्रधान नरेंद्र मोदी यांना पत्र लिहून विविध मुद्द्यांवर संसदीय चर्चा घडवून आणण्याचे आवाहन केले आहे.
विशेष सखोल पुनरावलोकन (SIR) प्रक्रियेदरम्यान मतदार यादीतून १३ कोटींहून अधिक नावे वगळल्याचा आरोप संजय सिंह यांनी केला आहे. या प्रक्रियेमुळे निवडणूक व्यवस्थेच्या पारदर्शकतेबाबत आणि निष्पक्षतेबाबत प्रश्न निर्माण होत असल्याचे त्यांनी पत्रात नमूद केले आहे. पात्र मतदारांना मतदानाच्या अधिकारापासून वंचित राहावे लागू नये, यासाठी या प्रकरणाची सखोल चर्चा करून जबाबदारी निश्चित करणे आवश्यक असल्याचे त्यांनी म्हटले आहे.
मुख्य निवडणूक आयुक्त ज्ञानेश कुमार यांच्या राजीनाम्याच्या मागणीसाठी झालेल्या आंदोलनादरम्यान पोलिसांनी आंदोलकांवर बळाचा वापर केल्याचा आरोप संजय सिंह यांनी केला आहे. या कारवाईत राजकीय नेते, कार्यकर्ते, पत्रकार, वकील आणि विद्यार्थ्यांना कथितरीत्या गैरवर्तनाला सामोरे जावे लागल्याचे त्यांनी म्हटले आहे. महिला आंदोलकांना जबरदस्तीने फरफटत नेल्याच्या आणि त्यांच्याशी गैरवर्तन झाल्याच्या आरोपांची तातडीने चौकशी करावी, अशी मागणीही त्यांनी केली आहे. शांततापूर्ण आंदोलन करणे आणि राजकीय मतभेद व्यक्त करणे हा नागरिकांचा घटनात्मक अधिकार असल्याचे सिंह यांनी अधोरेखित केले.
आंदोलनाच्या पार्श्वभूमीवर दिल्ली मेट्रोच्या ५७ स्थानकांवरील प्रवेश आणि निर्गमन बंद केल्याच्या निर्णयावरही संजय सिंह यांनी आक्षेप घेतला आहे. या निर्बंधांमुळे सामान्य नागरिकांच्या प्रवासावर परिणाम झाल्याचा दावा त्यांनी केला. तसेच, सर्वोच्च न्यायालयाच्या परिसरानजीक वकिलांना ताब्यात घेतल्याच्या आणि त्यांच्यावर कथित शारीरिक अत्याचार झाल्याच्या वृत्तांची चौकशी करण्याची मागणीही त्यांनी केली आहे. मतदार यादीतील कथित अनियमितता, निवडणूक आयोगाची निष्पक्षता, मुख्य निवडणूक आयुक्तांच्या राजीनाम्याची मागणी, आंदोलकांवरील पोलीस कारवाई, महिला आंदोलकांची सुरक्षा आणि मेट्रो स्थानकांवरील निर्बंध या मुद्द्यांचा विशेष अधिवेशनाच्या चर्चेत समावेश करावा, असे संजय सिंह यांनी पत्रात म्हटले आहे.
