नाशिकमधून लोकसभा निवडणूक लढवण्याच्या बेतात असलेले राष्ट्रवादी काँग्रेसचे नेते छगन भुजबळ यांच्याविरोधात मराठा योद्धा मनोज जरांगे-पाटील यांनी शड्डू ठोकला आहे. भुजबळ फक्त लोकसभेला उभे राहू द्यात, मग दाखवतोच, असा इशारा त्यांनी दिला आहे.
महायुतीच्या जागावाटपाच्या तिढय़ातून नाशिक मतदारसंघाची अद्याप सुटका झालेली नाही. मात्र अजित पवार गटाने भुजबळ यांना नाशिकच्या मैदानात उतरवण्याच्या हालचाली सुरू केल्या आहेत. या पार्श्वभूमीवर जरांगे यांनी भुजबळांची काsंडी करण्याचे संकेत दिले.
मनोज जरांगे आज पुण्यातील देहू येथे आले होते. त्यांना यासंदर्भात प्रसारमाध्यमांनी विचारले असता त्यांनी भुजबळांबद्दल जास्त काही विचारू नका, असे सांगितले तसेच लोकसभा लढवायचा भुजबळांचा अंतिम निर्णय होऊ द्या मग सांगतो, असे जरांगे म्हणाले. राज्यभरात कोणत्या उमेदवारांना निवडून द्यायचे हे मराठा समाजाने ठरवावे, पण नाशिकमधून भुजबळ उभे राहिले तर काय भूमिका घ्यायची हे त्यावेळी सांगतो, असे त्यांनी स्पष्ट केले.
