राजस्थानच्या चुरू जिल्ह्यात रणजितसिंह ढोली नावाच्या व्यक्तीची हत्या करण्यात आली आहे. या प्रकरणी रणजितची बायको आणि तिचा प्रियकर यांना पोलिसांनी अटक केली आहे. रणजित याचा खून क्राईम पेट्रोल ही मालिका पाहून सुचलेल्या कटानुसार केल्याची कबुली रणजितच्या बायकोने आणि तिच्या प्रियकराने दिली आहे. रणजित याचा स्कार्फने गळा आवळून खून केल्याचे त्याच्या बायकोने पोलिसांना सांगितले आहे. ही घटना मंगळवारी संध्याकाळी बिरमसर गावात घडल्याचे पोलिसांनी सांगितले.
रणजितचं लग्न सरोजदेवी नावाच्या महिलेशी झालं होतं. लग्नानंतर सरोजदेवी हिचे सुरेंद्र जाट नावाच्या तरुणीशी सूत जुळले होते. आपल्या बायकोचे अनैतिक संबंध असल्याचं कळाल्यानंतर रणजित संतापला होता. त्याच्यात आणि सरोजमध्ये याच मुद्दावरून वारंवार भांडणं होत होती. 27 डिसेंबर रोजी दोघांत कडाक्याचे भांडण झाले. भांडणामुळे संतापलेल्या सरोजदेवी हिने रणजितला ठार मारण्याचं निश्चित केलं. सरोजदेवी तिचा प्रियकर सुरेंद्रला घरी बोलावून घेतलं होतं. सुरेंद्रच्या मदतीने सरोजदेवीने रणजितची गळा आवळून हत्या केली. रणजितला ठार मारल्यानंतर सुरेंद्र तिथून पळून गेला होता. सरोजदेवीने आपल्यावर लोकांचा संशय येऊ नये यासाठी रणजितने आत्महत्या केली असा कांगावा केला.
रणजितचा भाऊ भवरसिंह ढोली याने मंगळवारी पोलीस ठाण्यात तक्रार केली होती. तक्रारीत त्याने त्याची वहिनी म्हणजेच सरोजदेवी हिच्यावरच आपल्याला संशय असल्याचं म्हटलं होत. सरोजदेवी आणि रणजितचं पटत नव्हतं, सरोजदेवीचे अनैतिक संबंध आपल्या भावाला पसंत नव्हते अशी माहिती भंवरसिंह याने पोलिसांना दिली होती. या गुन्ह्याचा माग काढण्यासाठी तपास पथकांना अलर्ट करण्यात आले. चुरूवरून एक फॉरेन्सिक पथक घटनास्थळी बोलावण्यात आले. पोलिसांना तपासात दिसून आले की रणजितने आत्महत्या केली नसून त्याचा खून करण्यात आला आहे. सरोजदेवी हिच्यावरील संशय पक्का झाल्यानंतर पोलिसांनी तिला ताब्यात घेऊन चौकशी केली आणि तिच्याकडून मिळालेल्या माहितीनंतर तिला आणि सुरेंद्र या दोघांविरोधात गुन्हा दाखल करत अटक केली.
