तृणमूल काँग्रेसचे खासदार कल्याण बॅनर्जी यांनी पक्षाचे राष्ट्रीय सरचिटणीस अभिषेक बॅनर्जी यांच्यावर गंभीर आरोप करत संताप व्यक्त केला आहे. अभिषेक बॅनर्जी यांच्या वागणुकीवर नाराजी व्यक्त केली आहे. भविष्यात अभिषेक बॅनर्जी यांच्याशी संबंधित कोणतेही प्रकरण न्यायालयात लढणार नाही. तसेच ममता बॅनर्जी यांनी ठरवावे त्यांना पक्षात कोण हवंय, मी की अभिषेक? असा थेट सवाल करत अल्टिमेटम दिला आहे.
कल्याण बॅनर्जी यांनी माध्यमांशी बोलताना सांगितले की, “मी अभिषेक बॅनर्जी यांचे कोणतेही प्रकरण लढणार नाही, कारण त्यांचा अहंकारी स्वभाव मला मान्य नाही. मी या व्यवसायात 45 वर्षे काम केले आहे. आज जे अनेक लोक मोठ्या पदांवर आहेत, त्यांनी माझ्या हाताखाली काम केले आहे. अशा परिस्थितीत ते माझा अपमान कसा करू शकतात?”
कल्याण बॅनर्जी म्हणाले की, “मी पक्षातील ज्येष्ठ नेता आहे. मी अपमान सहन करणार नाही. अभिषेक बॅनर्जी यांनी हे समजून घेतले पाहिजे की, अलीकडील पराभवासाठी तेच जबाबदार आहेत. पक्ष सध्या ज्या संकटाचा सामना करत आहे, त्यामागेही त्यांचाच वाटा आहे.”
कल्याण बॅनर्जी यांनी पक्षप्रमुख आणि पश्चिम बंगालच्या माजी मुख्यमंत्री ममता बॅनर्जी यांनाही थेट संदेश दिला. “मी दीदींना विनंती करतो की, जर तुम्ही अभिषेक बॅनर्जी यांच्यावरच अवलंबून राहणार असाल तर, त्यांच्यासोबतच राहा आणि मला बाजूला करा. मात्र, जर तुम्ही अभिषेक बॅनर्जींपासून वेगळी भूमिका घेतली तर, मी तुमच्यासोबत उभा आहे,” असे त्यांनी म्हटले. अभिषेक बॅनर्जी यांनी पक्षाचे मोठे नुकसान केले असून तृणमूल काँग्रेसला अडचणीत आणण्यास तेच कारणीभूत आहेत”, असेही कल्याण बॅनर्जी म्हणाले.
#WATCH कोलकाता, पश्चिम बंगाल: TMC सांसद कल्याण बनर्जी ने कहा, “… मैं अभिषेक बनर्जी का कोई भी केस नहीं लड़ूंगा क्योंकि मुझे उनका घमंडी रवैया पसंद नहीं है। मैंने इस पेशे में 45 साल बिताए हैं; ये सभी लोग मेरे साथ जूनियर के तौर पर काम कर चुके हैं। वह मेरा अपमान कैसे कर सकते हैं?… pic.twitter.com/RFjXae3pvd
— ANI_HindiNews (@AHindinews) June 11, 2026
