लोकसभा निवडणुकीची रणधुमाळी सुरू झाली असून, ठिकठिकाणी ‘इंडिया आघाडी’च्या स्टार प्रचारकांच्या तोफा धडाडू लागल्या आहेत. या पार्श्वभूमीवर काँग्रेस नेते राहुल गांधी यांची बुधवारी (दि. 24) दुपारी जाहीर सभा होणार आहे.
सोलापूर लोकसभा मतदारसंघासाठी 7 मे रोजी मतदान होणार आहे. या पार्श्वभूमीवर महाविकास आघाडीच्या उमेदवार काँगेसच्या प्रणिती शिंदे यांच्या प्रचारार्थ काँग्रेस नेते राहुल गांधी यांच्या जाहीर सभेचे आयोजन करण्यात आले आहे. बुधवार (दि. 24) दुपारी 3 वाजता शहरातील मरीआई चौकातील एक्झिब्युशन ग्राउंड येथे सभा होणार आहे, अशी माहिती निवडणूकप्रमुख प्रकाश यलगुलवार, सोलापूर शहर काँग्रेसचे अध्यक्ष चेतन नरोटे, काँग्रेस जिल्हा कार्याध्यक्ष नंदकुमार पवार यांनी दिली.
सोलापूर लोकसभा मतदारसंघात महाविकास आघाडीच्या उमेदवार प्रणिती शिंदे आणि भाजपचे राम सातपुते यांची चुरशीची लढत होत आहे. प्रणिती शिंदे सध्या गावभेट दौरे करून मतदारांच्या गाठीभेटी घेत आहेत, याला मतदारांचा उत्स्फूर्त प्रतिसाद मिळत आहे.
दरम्यान, प्रणिती शिंदे यांच्या प्रचारासाठी नुकतेच काँग्रेसचे माजी मंत्री सतेज पाटील आणि अमित देशमुख यांच्या जाहीर सभा पार पडल्या. त्यानंतर आता काँग्रेसचे नेते राहुल गांधी यांची बुधवारी (दि. 24) जाहीर सभा होणार आहे.
