नांदेडच्या बिलोली तालुक्यातील धुरंदर राजकारणी म्हणून ओळख असलेले कोल्हेबोरगाव येथील रहिवासी व नांदेड जिल्हा परिषदेचे शिवसेनेचे माजी अध्यक्ष बाबाराव जमनाजी एंबडवार (वय 72) यांचे अपघाती निधन झाले आहे. पुणे- सोलापूर हायवेवर सोलापूर पासून 40 किलोमीटर अंतरावर माळवत-चिखली या गावाजवळ 1 जुलै रोजी रात्री 11 वाजण्याच्या सुमारास त्यांची कार ट्रकला धडकली या अपघातात त्यांचा मृत्यू झाला.
बाबाराव एंबडवार हे पुण्याला आपल्या मुलाला भेटण्यासाठी कारने जात होते. यावेळी पुणे- सोलापूर हायवेवर माळवत-चिखली या गावाजवळ शनिवारी रात्री 11 वाजण्याच्या सुमारास त्यांची कर रस्त्यात उभ्या असलेल्या ट्रकवर आदळली. या अपघातात बाबाराव एंबडवार यांचा जागीच मृत्यू झाला. अपघात घडल्यानंतर जवळपास दीड तास त्यांना मदत मिळू शकली नाही त्यामुळे कार मध्येच अडकून होते. दीड तासानंतर क्रेनच्या सहाय्याने त्यांचा मृतदेह कारमधून बाहेर काढण्यात आला.
या अपघातात त्यांचा चालक करीमखान पठाण व रामचंद्र मोरे हे गंभीर जखमी झाले आहेत. त्यांच्यावर सोलापूर येथील रुग्णालयात उपचार सुरू असल्याची माहिती त्यांच्या निकटवर्तीयांनी दिली आहे.
कोल्हेबोरगाव ग्रामपंचायतीचे सरपंच, सोसायटीचे चेअरमन, कुंडलवाडी कृषी उत्पन्न बाजार समितीचे 12 वर्ष सभापती, बिलोली पंचायत समितीचे सभापती, जिल्हा परिषदेचे दोन वेळा उपाध्यक्ष आरोग्य व शिक्षण सभापती ते शिवसेना पक्षाकडून जिल्हा परिषदेचे दोन वेळेस अध्यक्षपद असा त्यांचा राजकीय प्रवास होता.
तालुक्यातील आरळी जिल्हा परिषद गटातून ते पाच वेळा सदस्य म्हणून निवडून आले. तसेच एक वेळेस आरळी जिल्हा परिषद मधून बिनविरोध सदस्य म्हणूनही निवडून आले. चेतना शिक्षण प्रसारक मंडळाचे ते संस्थापक अध्यक्ष होते. राजकीय, सामाजिक व शैक्षणिक क्षेत्रातील खंबीर नेतृत्व म्हणून आजही त्यांची तालुक्यात ओळख होती. माजी खासदार भास्करराव पाटील खतगावकर हे बाबाराव एंबडवार यांचे राजकीय गुरू होत.
बाबराव एंबडवार यांच्या अपघाती निधनाने तालुक्यावर शोककळा पसरली असून अनेक राजकीय मंडळींनी त्यांच्या निधनाबद्दल दुःख व्यक्त केले आहे. त्यांच्या पार्थिवावर कोल्हेबोरगाव येथे आज 2 जुलै रोजी सायंकाळी 5:30 वाजता अंत्यसंस्कार करण्यात येणार आहेत. त्यांच्या पश्चात पत्नी, दोन मुले, दोन मुली, सुना, नातवंडे असा मोठा परिवार आहे. अपघाताची माहिती कळताच त्यांचे पुत्र सुनील एंबडवार, संतोष एंबडवार, डॉ. वर्षा एंबडवार व मुख्याध्यापक अशोक दगडे हे अपघातस्थळी पोहचले.
