गुजरातची प्रगती झाली तर देशाची प्रगती होईल; सूरत डायमंड बोर्सच्या उद्घाटनात पंतप्रधान मोदींचे विधान

सामना ऑनलाईन
|

जगातील सर्वांत मोठे कार्यालय असलेल्या सूरत डायमंड बोर्सचे रविवारी पंतप्रधान नरेंद्र मोदी यांच्या हस्ते उद्घाटन झाले. गेल्या काही वर्षांत सूरत व्यापारी पेठ म्हणून उदयाला येत आहे. त्यामुळे येथे आता सराफा बाजार केंद्र निर्माण करण्याच्या उद्देशाने सूरत डायमंड बोर्स तयार करण्यात आले आहे. यामुळे देशाला जागतिक स्तरावर हिरे व्यापार करण्यास संधी मिळेल, असे पंतप्रधान नरेंद्र मोदी म्हणाले.

तुम्हा सर्वांचे सामर्थ्य वाढवण्यासाठी सरकार सूरतचेही सामर्थ्य वाढवत आहे. आमचे सरकार सूरतमध्ये आधुनिक पायाभूत सुविधांसाठी विशेष प्रयत्न करत आहे. आज सूरतमध्ये आंतरराष्ट्रीय दर्जाचे विमानतळ आहे. सूरतमध्ये मेट्रो रेल्वे सेवा आहे. सूरत पोर्टमध्ये अनेक महत्त्वाच्या उत्पादनांच्या निर्यातीसाठी बंदर आहे. सूरत सातत्याने आंतरराष्ट्रीय व्यापारी केंद्राशी जोडले जात आहे. अशी आंतरराष्ट्रीय कनेक्टिव्हिटी जगातील फार कमी शहरात आहे. सूरतला बुलेट ट्रेन प्रकल्पाशीही जोडले आहे. वेस्टर्न डेडिकेट फ्रेट कॉरिडॉरवरही काम सुरू आहे. यामुळे, देशातील उत्तर-पूर्व भागापर्यंत सूरतची रेल्वे नेटवर्क सशक्त होणार आहे. अशी कनेक्टिव्हिटी असणारे सूरत देशातील एकमेव शहर आहे. सूरतची प्रगती झाली तर गुजरातची प्रगती होईल आणि गुजरातची प्रगती झाली तर माझ्या देशाची प्रगती होईल, असेही मोदी यांनी सांगितले.

जागतिक अर्थव्यवस्थेत देश नक्कीच तिसऱ्या क्रमांकावर जाणार आहे. सरकारने येणाऱ्या 25 वर्षांचेही लक्ष्य ठरवले आहे. 5 ट्रिलिअन डॉलर आणि 10 ट्रिलिअन डॉलर अर्थव्यवस्थेसाठी काम केले जात आहे. आम्ही देशाच्या निर्यातीलाही उंचीवर घेऊन जाण्यासाठी काम करत आहोत. यात सूरतच्या डायमंड इंडस्ट्रीची जबाबदारी वाढली आहे, असेही मोदी म्हणाले. सूरत शहरालाही टार्गेट ठरवले पाहिजे. देशाच्या प्रगतीत सूरतची भागिदारी कशी वाढेल, हे सूरतने आता ठरवले पाहिजे. डायमंड सेक्टर जेम्स आणि ज्वेलर्ससाठी आव्हानही आहे आणि संधीही आहे. डायमंड ज्वेलरी एक्स्पोर्टमध्ये देश पुढे आहे. सिल्वर कट डायमंडमध्येही आपण अग्रेसर आहोत. जगातील एकूण निर्यातीत देशाची टक्केवारी फक्त साडेतीन टक्के आहे. सूरतने ठरवले तर जेम्स आणि ज्वेलरी एक्स्पोर्टमध्ये आपण डबल डिजिटमध्ये येऊ शकतो, असेही मोदी म्हणाले.

मी गॅरंटी देतो की तुमच्या प्रत्येक प्रयत्नात सरकार तुमच्यासोबत आहे. आम्ही सुरुवातीपासूनच या सेक्टरला एक्स्पोर्ट प्रमोशनसाठी फोकस एरिआ ठरवले आहे. अनेक प्रयत्न केंद्र सरकार करत आहे. आपल्या या प्रयत्नांचा जास्तीत जास्त फायदा उठवायचा आहे. आज आंतरराष्ट्रीय स्तरावर भारताचा बोलबाला आहे. जगभर हिंदुस्थानची चर्चा आहे, असेही मोदी म्हणाले.

संबंधित बातम्या या पब्लिशरकडून आणखी