मिंधे सरकारमधील आरोग्यमंत्री तानाजी सावंत यांचे एकएक कारनामे उघड होत आहेत. अ‍ॅम्ब्युलन्स घोटाळ्यानंतर आता टेंडरमध्येही मलिदा खाण्यासाठी सावंत यांनी पुणे महापालिकेत आरोग्य प्रमुखपदावर डॉ. भगवान पवार यांची नियुक्ती केली होती. मात्र या पदावर नियुक्त होण्यापूर्वी असलेल्या आरोपांचा हवाला देत मिंधे सरकारने त्यांच्यावर निलंबनाची कारवाई केली. यानंतर डॉ. भगवान पवार यांनी मुख्यमंत्र्यांना पत्र लिहून तानाजी सावंत यांच्यावर खळबळजनक आरोप केले आहेत.
आरोग्यमंत्र्यांनी पुण्यातील कात्रज येथे असणाऱ्या कार्यालयात वारंवार बोलावून नियमबाह्य टेंडरची कामं, खरेदी प्रक्रियेची कामं आणि इतर कामांमध्ये मदत करण्याचा दबाव आणला होता. मात्र नियमबाह्य कामात मदत केली नाही म्हणून माझे निलंबन करण्यात आले, असा गंभीर आरोप डॉ. भगवान पवार यांनी केला आहे. त्यांच्या या आरोपांमुळे ‘खेकडा’फेम मंत्री तानाजी सावंत यांची पुन्हा एकदा पोलखोल झाली आहे.
काय आहे पत्र?
आदरणीय महोदय, मी सार्वजनिक आरोग्य विभागातील जेष्ठतम अधिकारी असून माझी एकूण सेवा 30 वर्ष झालेली असून जिल्हा आरोग्य अधिकारी, पुणे व सातारा येथे एकूण 13 वर्षे उत्कृष्ठ कामकाज केलेले आहे. माझे गत 5 वर्षातील गोपनिय अभिलेख अत्युत्कृष्ठ (10/10) असून वरीष्ठ अधिकारी यांची कामाबाबत कोणतीही तक्रार नाही. कोवीड-19 च्या साथ उद्रेकामध्ये मी पुणे जिल्ह्यामध्ये जिल्हा आरोग्य अधिकारी म्हणून उत्कृष्ठ सेवा बजावलेली आहे. विविध कामकाजाबाबत माझा आयुक्त, आरोग्य सेवा, मुंबई, विभागीय आयुक्त, पुणे, जिल्हाधिकारी व पालकमंत्री महोदय (पुणे/सातारा) यांचेमार्फत वेळोवेळी सत्कार केलेला आहे.
आरोग्य विभागात तानाजी सावंत यांचा कोट्यावधींचा घोटाळा, रोहित पवार यांनी केला गौप्यस्फोट
सद्यास्थितीत मी आरोग्य अधिकारी (आरोग्य प्रमुख), पुणे महानगरपालिका येथे दि.13/03/2023 पासून कार्यरत होतो, सदरहू ठिकाणी माझ्या कामकाजाबाबत कोणत्याही गंभीर तक्रारी नाहीत अथवा प्रशासकीय चौकशी झालेली नाही तसेच आयुक्त, पुणे महानगरपालिका यांचे माझ्या कामकाजाबाबत प्रतिकुल शेरे नाहीत. तरीही शासनामार्फत उपरोक्त संदर्भान्वये माझ्या निलंबनाचे आदेश प्राप्त झालेले आहेत व हे मला आज (14.28/4) / 2028 रोजी संध्याकाळी 6.00 वाजता मिळाले.
माझे कामकाज व सर्व्हिस रेकॉर्ड उत्तम असताना केवळ मागासवर्गीय अधिकारी म्हणून व हेतुपुरस्सरपणे त्रास देण्याच्या हेतूने प्रेरीत होवून माझे निलंबन करण्यात आलेले आहे. मा. मंत्री महोदय यांनी मला पुणे स्थित कात्रज येथील कार्यालयात वारंवार बोलावून नियमबाह्य टेंडरची कामे, खरेदी प्रक्रियेची कामे व इतर कामामध्ये मदत करणेस दबाव आणला होता. परंतु, मी नियम बाह्य कामात मदत केली नाही व इतर नियमबाह्य कामे केली नाहीत, म्हणून माझे निलंबन करण्यात आलेले आहे. मी मॅटमध्ये दावा दाखल केला हा आकस मनामध्ये ठेवून माझी मानसिक छळवणूक सुरु केली होती. आरोग्य अधिकारी (प्रमुख), महानगरपालिका पुणे हे पद रिक्त करण्याकामी माझ्या विरुध्दच्या तथ्य नसलेल्या जुन्या तक्रारीच्या अनुषंगाने 29-04-2024 रोजी चौकशी समिती स्थापन करुन चौकशी न करताच घाई गडबडीत त्यांना अपेक्षित तो अहवाल प्राप्त करुन संदर्भ क्र.1 च्या आदेशान्वये मला निलंबित करणेत आलेले आहे.
सबब माझे निलबंन हे माझ्या विरुध्द तक्रारीमध्ये तथ्य नसतांनाही हेतुपुरस्सरपणे त्रास देण्याच्या हेतूने व माझे मानसिक खच्चीकरण करण्यासाठी मा. मंत्री महोदय यांच्या दबावामुळे केलेले आहे, अशी माझी धारणा आहे. झालेल्या निलंबनामुळे माझे मनोधैर्य खचुन गेले असून माझे कुटुंब मानसिक तणावामध्ये आहे. निलंबन करित असताना, माझ्या सध्याच्या कार्यकालातील तक्रारी नसताना केवळ जुन्या तक्रारी शोधून काढून आणि माझे म्हणने सादर करणेची कोणतीही संधी न देता माझे निलबंन करुन माझ्यावर अन्याय झालेला आहे, असे डॉ. भगवान पवार यांनी पत्रात म्हटले आहे. आता यावर मुख्यमंत्री काय कारवाई करतात याकडे सर्वांचे लक्ष आहे.
