बीड लोकसभा मतदारसंघातील भाजपच्या उमेदवार पंकजा मुंडे यांना बुधवारी मराठा आंदोलकांच्या रोषाला सामोरे जावे लागले. हरिनाम सप्ताहाला भेट देण्यासाठी जात असताना मराठा आंदोलकांनी त्यांची गाडी अडवून ‘एक मराठा लाख मराठा’ अशी घोषणाबाजी केली. पंकजा मुंडे यांना गावात जाण्यास विरोध करण्यात आला. त्यामुळे एकच गोंधळ उडाला. यावेळी संतप्त जमावाला पांगवण्यासाठी पोलिसांनी लाठीमार केला.
केज तालुक्यातील पावनधाम येथे अखंड हरिनाम सप्ताहाचे आयोजन करण्यात आले आहे. या सप्ताहाला भेट देण्यासाठी पंकजा मुंडे यांचा ताफा आला. मात्र मराठा आंदोलकांनी मुंडे यांच्या ताफ्याचा रस्ता अडवला. ‘एक मराठा लाख मराठा’ अशा घोषणा सुरू झाल्या. पंकजा मुंडे यांनी आंदोलकांशी संवाद साधण्याचा प्रयत्न केला, परंतु आंदोलक कुणाचेही ऐकण्याच्या मन:स्थितीत नव्हते. पंकजा मुंडे यांना गावात जाण्यास आंदोलकांनी विरोध केला. गोंधळ वाढल्याने पोलिसांनी लाठीमार करून जमाव पांगवला आणि संरक्षणात पंकजा मुंडे यांची गाडी गर्दीतून बाहेर काढली.
लोकसभेची उमेदवारी मिळाल्यानंतर पंकजा मुंडे प्रचारासाठी जात असताना त्यांना मराठा समाजाच्या रोषाचा सामना करावा लागत आहे. दोन दिवसांपूर्वीच साक्षाळपिंप्री येथे मराठा आंदोलकांनी पंकजा मुंडेंना काळे झेंडे दाखविले होते. या आंदोलकांवर गुन्हे दाखल करण्यात आले होते.
