पवई हिरानंदानी येथील 90 फिट रोडजवळील झोपडपट्टीत आज सकाळी लागलेल्या आगीत 15 झोपडय़ा जळून खाक झाल्या. अग्निशमन दलाने तातडीने आगीवर नियंत्रण मिळवल्याने सुदैवाने यात कोणतीही जीवितहानी झाली नाही.
पवई हिरानंदानी 90 फूट रोडवरील झोपडपट्टी परिसरात सकाळी 11.15 वाजताच्या सुमारास अचानक आग लागली. घटनास्थळी विद्युत वायरिंग, घरगुती वस्तू, कपडे, एलपीजी सिलिंडर, कागदपत्रे, लाकडी फर्निचर आदी साहित्यामुळे आग आणखी भडकली. आग पसरल्याने यात 12 ते 15 झोपडय़ांसह साहित्य जळून खाक झाले. सुदैवाने यात कोणीही जखमी झालेले नाही. आगीची माहिती मिळताच अग्निशमन दलाने तातडीने कार्य करीत एका तासाने आगीवर नियंत्रण मिळवले. दरम्यान, ही आग कशामुळे लागली याचा तपास पोलीस आणि अग्निशमन दल करीत असल्याची माहिती पालिकेच्या आपत्कालीन विभागाकडून देण्यात आली.
