लोकसभा निवडणुकीच्या तोंडावर जिह्यात घातपात घडवून आणण्याचा नक्षलवाद्यांचा डाव पोलिसांनी उधळून लावला. एटापल्ली आणि धानोरा तालुक्याच्या शेवटच्या टोकावर छत्तीसगड सीमेलगतच्या टेकडीवरील नक्षलवाद्यांचा तळ उद्ध्वस्त केला. पेंढरीपासून 12 किलोमीटर अंतरावर पूर्वेला छत्तीसगडच्या मानपूर जिह्यातील चुटीनटोला गावाजवळ 450 मीटर उंच पहाडी भागात नक्षलवादी तळ ठोकून असल्याची गोपनीय माहिती मिळताच पोलीस अधीक्षक नलोत्पल यांनी 30 मार्च रोजी नक्षलविरोधी अभियान राबवले. अपर अधीक्षक यतीश देशमुख यांच्या नेतृत्वाखालील सी-60 जवानांच्या पथकाने पहाडी पार करून नक्षलवाद्यांचा तळ उद्ध्वस्त केला. पोलिसांनी कार्डेक्स वायर, डिटोनेटर, जिलेटिन स्टिक्स, बॅटरी, वॉकी टॉकी चार्जर, बॅकपॅक असा शस्त्रसाठा आणि साहित्य जप्त केले.
