चारित्र्याच्या संशयावरून प्रियकराने प्रेयसीच्या डोक्यात प्रेशर कुकर घालून तिची निर्घृणपणे हत्या केल्याची धक्कादायक घटना कर्नाटकची राजधानी बंगळुरूमध्ये घडली आहे. देवी (वय – 24) असे मृत तरुणीचे नाव आहे. याप्रकरणी पोलिसांनी तिचा प्रियकर वैष्णव (वय -24) याला अटक केली आहे.
पोलिसांनी दिलेल्या माहितीनुसार, वैष्णव आणि देवी हे दोघेही मूळचे केरळचे असून दोघांनीही एकत्र शिक्षण घेतले आहे. गेल्या तीन वर्षांपासून ते लिव्ह-इनमध्ये रहात होते. बंगळुरुतील कोरमांगला भागातील सेल्स आणि मार्केटिंग कंपनीमध्ये दोघे कामाला होते. दोघांमध्ये वारंवार वादही होत होते.
Bengaluru, Karnataka | Begur Police says, “A 24-year-old man, Vaishnav arrested by Police for allegedly killing his live-in partner Devi (24) by hitting her with a pressure cooker on her head. The incident occurred in the Mico Layout Police Station area. Both of them are from…
— ANI (@ANI) August 28, 2023
देवी आपल्याला धोका देत असल्याचा संशय आरोपीला होता. यावरून दोघांमध्ये वारंवार भांडणही होत होते अशी माहिती त्यांच्या शेजाऱ्यांनी पोलिसांना दिली. शनिवारीही दोघांमध्ये वाद झाला आणि या वादाचे पर्यवसन खुनामध्ये झाले. रागाच्या भरामध्ये आरोपी वैष्णवने प्रेशर कुकरने देवीच्या डोक्यावर वार केले. हे वार वर्मी लागल्याने देवीचा जागीच मृत्यू झाला.
दरम्यान, देवीच्या हत्येनंतर आरोपी वैष्णवने पळून जाण्याचा प्रयत्न केला. मात्र पोलिसांनी त्याला अलगद पकडले. त्याच्याविरोधात भादवि कलम 302 अंतर्गत गुन्हा दाखल करण्यात आला असून त्याची कसून चौकशी सुरू असल्याची माहिती, दक्षिण-पूर्व डिव्हिजनचे डीसीपी सी.के. बाबा यांनी माध्यमांशी बोलताना दिली.