विरोधकांनी लोकसभेला जो भावनिक प्रचार केला, तसाच याही वेळेस होईल. दोन महिन्यात पोटनिवडणूकीची घाई का केली, असा सवाल करत विरोधकांना जनतेचा पोकळ कळवळा आला आहे. त्यांच्या बेगडी प्रेमाला जनताच उत्तर देईल, असे प्रतिपादन आमदार पृथ्वीराज चव्हाण यांनी केले. विंग (ता. कराड) येथील श्री मारुती मंदीरात काँग्रेस आघाडीचे लोकसभेचे उमेदवार श्रीनिवास पाटील व विधानसभेचे उमेदवार पृथ्वीराज चव्हाण यांच्या प्रचारास सुरुवात झाली. त्यावेळी ते बोलत होते.
चव्हाण म्हणाले, कराड ते चिपळूण रेल्वे मार्गास मंजुरी मिळवली. कराड ते ढेबेवाडी हा मार्ग मी कोकणापर्यंत नेणार आहे. विकासाच्या अनेक कल्पना घेऊन तुमची सेवा करत आहे. मी मंजूर केलेली कामे या नतद्रष्ट मंडळींनी अडवली आहेत. वानरवाडी तलाव व येणके-पोतले पुलाच्या कामास यांनीच विरोध केला. मी रेठऱ्याला दिलेला निधीही यांनी नाकारला. माझ्यापेक्षा दहापट कामे करा, मी तुम्हाला कुठे अडवले आहे, असे आव्हानही त्यांनी यावेळी दिले.
श्रीनिवास पाटील म्हणाले, लोकांनी कराडच्या इतिहासाची आठवण ठेवावी. इतिहासात कराडचे यशवंतराव चव्हाण, प्रेमलाकाकी, आनंदराव काका व सध्या पृथ्वीराज चव्हाण या चौघांनी काम केले आहे. ही वस्तुस्थिती असताना आम्ही काय केले असे विरोधक विचारतात. जे पेरले तेच उगवते, हे त्यांनी लक्षात ठेवावे. काहीवेळेस न पेरलेलेसुद्धा उगवते. ते पेरलेले नसते. जनतेने हे ओळखून येत्या 21 तारखेला पक्षाच्या चोचीतून जमिनीवर पडलेले उगवून देऊ नका, असा टोला लगावला. डॉ. इंद्रजीत मोहिते, अविनाश मोहिते, राजेंद्र चव्हाण, नामदेव पाटील, मनोहर शिंदे, रघुनाथराव कदम यांचीही यावेळी भाषणे झाली. यावेळी विंग, घोगाव व कालवडे येथील अनेक कार्यकर्त्यांनी काँग्रेसमध्ये प्रवेश केला.
