छोटय़ा पडद्यावर काम करणाऱया अभिनेत्रीचे 8 लाख रुपये किमतीचे घडय़ाळ तिच्या मोलकरणीने लांबवल्याची घटना घडली आहे. याप्रकरणी गोरेगाव पोलिसांनी मोलकरणीविरोधात गुन्हा नोंद केला आहे.
फेब्रुवारी महिन्यात अभिनेत्रीच्या घरी कामासाठी एका एजन्सीच्या माध्यमातून महिला ही घरकामासाठी आली होती. फेब्रुवारीत अभिनेत्रीने मीटिंगसाठी ते घडय़ाळ घातले होते. त्यानंतर ते घडय़ाळ कपाटात ठेवले होते. मार्च महिन्यात अभिनेत्री घरी होती. तेव्हा ती मोलकरीण कपडे सुकत टाकण्याच्या नावाखाली गॅलरीमध्ये काही तरी लपवत असताना दिसली. तेव्हा अभिनेत्रीने तिला जाब विचारला. दोन तासांनी ती अभिनेत्रीजवळ आली. आई आजारी असल्याने तत्काळ गावी जावे लागेल असे तिने अभिनेत्रीला सांगितले. मोलकरणीने विनंती केल्यानंतर अभिनेत्रीने तिला गावी जाण्यास परवानगी दिली. दोन दिवसांपूर्वी अभिनेत्रीला एका इव्हेंटसाठी घडय़ाळ घालायचे होते. तिने कपाट उघडले तेव्हा घडय़ाळ चोरी झाल्याचे लक्षात आले. याप्रकरणी अभिनेत्रीने गोरेगाव पोलीस ठाण्यात धाव घेतली.
