स्थानिक गुन्हे शाखेने जुगार अड्ड्यावर छापा टाकत 13 जणांविरूध्द जुगार कायद्यान्वये गुन्हा दाखल केला आहे. तसेच त्यांच्याकडून 6 लाख 94 हजार 460 रुपयांचा मुद्देमाल जप्त करण्यात आला आहे.
पोलीस अधीक्षक सोमय मुंडे यांनी लातूर जिल्ह्यात अवैध धंद्याविरूध्द कारवाई करण्याचे निर्देश दिले आहेत. त्या अनुषंगाने अप्पर पोलीस अधीक्षक डॉ. अजय देवरे यांच्या मार्गदर्शनात स्थानिक गुन्हे शाखेचे पोलीस निरीक्षक गजानन भातलवंडे यांच्या नेतृत्वात अवैध धंद्याविरूध्द मोहीम राबविण्यात येत आहे. अवैध धंद्यावर कारवाई करीत असताना मिळालेल्या गोपनीय माहितीच्या आधारे मंगळवारी रात्री १० वाजण्याच्या सुमारास स्थानिक गुन्हे शाखेच्या पथकाने अहमदपूर पोलीस ठाणे हद्दीतील जगळपूर जाणार्‍या रोडवर भगतसिंग पवार याच्या शेतातील पत्र्याच्या शेडवर छापा मारला असता तेथे फारूक अहमद नळगीरे (वय 45), भगतसिंग शिवराम पवार (वय 59), इरफान मुबारक शेख (वय 24), सचिन संपत्ती कांबळे (वय 32), अनिल पुंडलिक साखरे (वय 44), इनामदार अब्दुल कासिक (वय 48), अंतेश्वर ज्ञानोबा पवार (वय 27), सूर्यकांत माधव गायकवाड (वय 41), अर्जुन अशोक जाधव (वय 27), बालाजी नारायण वसमतकर (वय 54), काशिनाथ तुकाराम पोटसुळवार (वय 57), दस्तगीर रशीद शेख (वय 55) , मारुती गुट्टे हे सर्व ग्रुप करून स्वतःच्या फायद्यासाठी पत्त्यावर पैसे लावून तिर्रट नावाचा जुगार खेळत व खेळवीत असताना आढळून आले. त्यांच्याकडून जुगाराचे साहित्य, रोख रक्कम, मोबाईल फोन व वाहने असा एकूण 6 लाख 94 हजार 460 रुपयांचा मुद्देमाल जप्त करण्यात आला आहे. या सर्वांविरोधात पोलीस ठाणे अहमदपूर येथे गुन्हा दाखल करण्यात आला असून, स्थानिक गुन्हे शाखेच्या पथकाने नमूद मुद्देमाल व 13 जणांना अहमदपूर पोलीस ठाण्याच्या ताब्यात देण्यात आले आहे. ही कामगिरी वरिष्ठांच्या मार्गदर्शनात व पोलीस निरीक्षक गजानन भातलवंडे यांच्या नेतृत्वातील पथकातील पोलीस अंमलदार संपत फड, मोहन सुरवसे व पोलीस ठाणे अहमदपूर येथील पोलीस अंमलदार आरदवाड, पोलीस नायक आरदवाड, पोलीस कॉन्स्टेबल पुठ्ठेवाड आणि कज्जेवाड यांनी केली आहे.
