मराठा आरक्षणासाठी लढा उभारणारे मनोज जरांगे पाटील यांच्यावर आपण कोणतीही टीका केली नाही, असा स्पष्ट खुलासा भाजपच्या उमेदवार पंकजा मुंडे यांनी केला आहे. मी गोपीनाथ मुंडे यांची वारसदार आहे, शब्द मागे घेत नाही, असेही त्या म्हणाल्या.
आष्टी, पाटोदा परिसरात एका जाहीर सभेत बोलताना भाजपच्या उमेदवार पंकजा मुंडे यांनी मराठा आंदोलन, मनोज जरांगे पाटील यांचा नामोल्लेख न करता कितीही आमरण उपोषण केले, भाषणे ठोकली तरी कायदा बदलत नाही, अशी टीका केली होती. यावरून वादळ उठताच त्यांनी घलमजाव करत मी असे बोललेच नाही मी वेगळ्या विषयावर बोलत होते. परंतु आपल्या बोलण्याचा विपर्यास करण्यात आला असे त्या म्हणाल्या. मी गोपीनाथ मुंडे यांची वारसदार आहे. मला बोलायचे असेल तर मी थेट बोलेन, आडपडदा ठेवून बोलणार नाही. मी कुणालाही घाबरत नाही, असेही त्या म्हणाल्या.
माझ्या वाटेला येऊ नका! मनोज जरांगे यांचा इशारा
पंकजा मुंडे यांनी केलेले विधान मी ऐकले नाही. त्यांना मी कधीही विरोधक मानले नाही. पण त्यांना याच वाटेला यायचे असेल तर मराठ्यांचाही नाईलाज होईल. मी तुमच्या वाटेला आलो नाही, तुम्ही माझ्या वाटेला येऊ नका, अशा स्पष्ट शब्दांत मनोज जरांगे पाटील यांनी पंकजा मुंडे यांना सुनावले.
