महाविकास आघाडीत चर्चा सुरू आहे. तुम्ही नेटाने काम करत प्रचाराचा वेग वाढवा. सांगलीत आपला विजय निश्चित आहे, असा विश्वास युवासेनेचे सचिव वरुण सरदेसाई यांनी व्यक्त केला.
सांगली येथील हॉटेलमध्ये आयोजित शिवसेना पदाधिकारी बैठकीत वरुण सरदेसाई यांनी सांगली मतदारसंघातील प्रचार नियोजनाचा आढावा घेतला. यावेळी त्यांनी पदाधिकाऱयांना महत्त्वाच्या सूचना दिल्या. यावेळी सांगली लोकसभेचे उमेदवार चंद्रहार पाटील, संपर्कप्रमुख प्रा. नितीन बानुगडे-पाटील, जिल्हाप्रमुख संजय विभुते, अभिजित पाटील, जिल्हा संघटक बजरंग पाटील, दिगंबर जाधव, उपजिल्हाप्रमुख शंभोराज काटकर, युवासेनेचे जिल्हा युवा अधिकारी ऋषिकेश पाटील, गुंठेवारी सेनेचे चंदन चव्हाण आदी पदाधिकारी उपस्थित होते.
वरुण सरदेसाई म्हणाले, ‘शिवसेना पक्षप्रमुख उद्धव ठाकरे यांनी मिरजेत उमेदवारीची घोषणा केल्यापासून आम्ही कामाला लागलो आहोत. डबल महाराष्ट्र केसरी चंद्रहार पाटील हे ताकदीने मैदानात उतरले आहेत. कार्यकर्ते कामात आहेत. येथे मित्रपक्षांची आम्हाला मदत होणारच आहे. चंद्रहार पाटील दोन दिवसांत गावभेटी सुरू करणार असून, यश नक्की मिळेल,’ असा विश्वास त्यांनी व्यक्त केला.
