तो खूप हट्टी आहे, फार हट्ट करतो… पण मीही हट्टी आहे; सोनिया गांधी राहूलबाबत काय म्हणाल्या…

सामना ऑनलाईन
|

आगामी लोकसभा निवडणुकांच्या पार्श्वभूमीवर सर्वच पक्षांनी तयारीला सुरुवात केली आहे. तसेच सत्ताधारी आणि विरोधकांमध्ये आरोप-प्रत्यारोपाच्या फैरी झडत आहेत. नवीन वर्षाच्या पूर्वसंध्येला राहुल गांधींनी त्यांच्या यूट्यूब चॅनलवर एक व्हिडीओ शेअर केला आहे. या व्हिडिओमध्ये ते आई सोनिया गांधींसमवेत त्यांची बहीण प्रियांका गांधी यांची एक रेसिपी किचनमध्ये तयार करताना दिसत आहेत. यावेळी दोन्ही मायलेकांमध्ये हलक्या फुलक्या वातावरणात चर्चा रंगली आहे. यावेळी सोनिया गांधी यांनी राहुल यांच्या स्वभावाबाबतही वक्तव्य केले आहे.

राहुल गांधींनी त्यांच्या यूट्यूब चॅनलवर ३१ डिसेंबर रोजी सकाळी हा व्हिडीओ पोस्ट केला आहे. आपल्या घरातल्या किचनमध्ये राहुल गांधी व सोनिया गांधी काम करत असल्याचं दिसत असून त्यासंदर्भात त्यांच्यात चर्चा होताना दिसत आहे. यावेळी राहुल गांधींनी गप्पांमध्ये भाजपाचाही उल्लेख केल्यानंतर सोनिया गांधींनीही त्यांना तितक्याच मिश्किलपणे दाद दिली.

यावेळी राहुल गांधींची कोणती सवय आवडत नाही? असा प्रश्न सोनिया गांधींना विचारला असता त्यांनी राहुल गांधींच्या हट्टीपणाबाबत उल्लेख केला. तो खूप हट्टी आहे. फार हट्ट करतो. पण मीही हट्टी आहे. त्यामुळे तुम्हाला अंदाज येईल की काय होत असेल. पण तो आणि प्रियांका माझी फार काळजी घेतात, असेही सोनिया यांनी सांगितले. तसेच यावेळी राहुल गांधींनी भाजपचा उल्लेख करत मिश्किल टिप्पणी केली. जर भाजपाच्या लोकांना हा जॅम हवा असेल, तर त्यांनाही तो मिळेल. तुला काय वाटतं आई? असा मजेशीर प्रश्न त्यांनी सोनिया गांधींना केला. त्यावर सोनिया गांधींनीही तितक्याच मिश्किलपणे ते तो पुन्हा आपल्याकडे फेकतील असे म्हणाल्या, त्यावर राहुल म्हणाले, मग चांगलंच आहे.. आपण तो पुन्हा उचलून घेऊ, असे तेवढेच गमतीदार उत्तर त्यांनी दिले.

संबंधित बातम्या या पब्लिशरकडून आणखी