हिंदुस्थानचा माजी अष्टपैलू खेळाडू अजित आगरकर याची भारतीय क्रिकेट नियामक मंडळ अर्थात बीसीसीआयने निवड समितीच्या अध्यक्षपदावर निवड केली आहे. चेतन शर्मा यांच्या जागी अजित आगरकर हा संघाचा मुख्य निवडकर्ता म्हणजेच सिलेक्टर म्हणून काम बघणार आहे.
गेल्या काही काळापासून अजित आगरकर याच्याकडे निवड समितीचं अध्यक्षपद सोपवलं जाऊ शकतं, अशा चर्चा रंगल्या होत्या. बीसीसीआयने मंगळवारी त्याची अधिकृत घोषणा केली.
एका स्टिंग ऑपरेशनमध्ये अडकल्यामुळे बीसीसीआयचे माजी अध्यक्ष चेतन शर्मा यांना आपल्या पदाचा राजीनामा द्यावा लागला होता. गेल्या काही महिन्यांपासून हे पद रिक्त होतं. आता मुंबईकर अजित आगरकरकडे ही जबाबदारी सोपवण्यात आली आहे. अजित आगरकरने काही दिवसांपूर्वीच आयपीएलमधील संघ दिल्ली कॅपिटल्सच्या प्रशिक्षकपदाचा राजीनामा दिला होता. आता तो नवी जबाबदारी पेलताना दिसणार आहे.