बारामती लोकसभा मतदारसंघाचा निवडणुकीचा 4 जूनला निकाल लागल्यानंतर उपमुख्यमंत्री अजित पवार यांना मिशा काढाव्या लागतील, असे अजित पवार यांचे सख्खे बंधू श्रीनिवास पवार यांनी म्हटले आहे. तसेच पवार कुटुंबातील राजकीय संघर्षामुळे अजित पवारांची आई नाराज झाली. माझा मुलगाही मला प्रिय आहे आणि दीरही तितकेच प्रिय आहेत. मला तुमच्या दोघांच्या लढाईत पडायचे नाही, असे सांगत आई आशा पवार बारामती सोडून पुण्यात बहिणीकडे राहायला गेली आहे. अजितदादांनी टोकाची भूमिका घेतल्यामुळेच आपण त्यांची साथ सोडल्याचे श्रीनिवास पवार यांनी सांगितले.
शरद पवार गटाकडून सुप्रिया सुळे आणि अजित गटाकडून सुनेत्रा पवार रिंगणात आहेत. शरद पवार आणि अजित पवार या दोघांनीही बारामतीमध्ये आपली संपूर्ण ताकद पणाला लावली आहे. या निवडणुकीनंतर आपण सोडून दुसरं कोण बारामतीत दिसलं तर आपण मिशा काढू, असे अजित पवार यांनी म्हटले होते. त्याला श्रीनिवास पवार यांनी आज उत्तर दिले.
