गोंदिया जिल्ह्यातील महसुल विभागात खळबळजनक घटना घडली आहे. गोरेगावचे तहसीलदार किसन के.भदाणे यांच्यासह नायब तहसिलदार नागपुरे आणि एका व्यक्तीला लाचलुचपत प्रतिबंधक विभागाच्या पथकाने लाच प्रकरणात ताब्यात घेतले आहे. या तिघांच्या विरोधात गोरेगाव पोलिसात गुन्हा दाखल करण्यात येत आहे. या प्रकरणाची कारवाई गोरेगाव तहसिल कार्यालयात करण्यात आली. या नंतर या सर्व आरोपींना पुढील तपास कारवाईसाठी गोंदिया येथील कार्यालयात आणण्यात आले आहे.
मिळालेल्या माहितीनुसार गोरेगाव तालुक्यातील वाळू वाहतूक प्रकरणी गोरेगाव तालुक्यातील गिधाडी या गावातील तक्रारदाराने दिलेल्या तक्रारीनुसार तहसीलदार किसन भदाने यांनी नायब तहसीलदार नागपुरे यांच्याद्वारे एक लाख रुपयांची मागणी केल्याची तक्रार आहे. यात गोरेगावचे तहसीलदार किसन के. भदाणे, नायब तहसिलदार नागपुरे आणि गणवीर नावाच्या एका व्यक्तीचा समावेश आहे.
